政情：公民講場：吳得掂又點火 家長四圍「撲」

被嘲為「吳得掂」嘅教育局局長吳克儉上任以來風波不斷，臨近九月開學，港獨入侵校園嘅爭議愈燒愈烈，啲火都未撲得熄，又爆出教科書不足嘅問題，火頭多到撲極都撲唔完。有出版商大呻，政府要求出版商將教科書分拆單元印刷令成本大增，故不得不先向學校確認各種版本所需嘅數量，再開機印刷，變相令教科書延遲應市，搞到家長要四圍撲書，真係火都嚟喇！依家距離開學不足兩個星期，吳得掂究竟有乜嘢方法令學生有新書開學呢？至今佢都未有回應。梗係喇，事關佢就係始作俑者，點講都甩唔到身。