政情：睇書玩遊戲 張灼祥不設限
拔萃男書院前校長張灼祥尋日現身一個名為「開啟創作世界」講座，話自己好鍾意睇書，乜嘢書都睇，即使係內容較為陰暗嘅亦無妨，好似早排被部分家長批評嘅網絡作家恐懼鳥嘅書，佢都認為可以睇，重點係家長點教。
唔單止睇書無界限，張灼祥連對好多人最近熱衷遊戲Pokémon GO周圍捉精靈嘅現象抱開放睇法，對於連宅男都能被吸引落公園感到驚嘆。佢話如果佢仲係校長，都唔會反對學生玩呢個遊戲，可能仲會搞番一日「精靈日」全校一齊捉，運動同時又可以認識唔同地方景點，當然梗係唔可以沉迷啦！
講起母校，佢自言係新界仔，當年入咗男拔後曾畀副校長問點解要喺呢度讀書，佢就反問「why not？」話希望喺九龍讀書衝出新界見識多啲。對於現時好多新媒體出現，學生文筆同詞彙或較以前遜色，影相同拍片成為大趨勢，張灼祥就唔介意嘗試去適應依家年輕人不時「圖文不符」嘅新表達方式喎。