政情：囝囝洞悉先機 蕭成財放心交棒
上一代創業者多數靠雙手，呢一代人就靠食腦。博愛醫院前主席蕭成財感受最深刻，事關佢經營日本知名電器品牌專門店三十年，看盡經濟景氣起落，有時少不免要睇個天食飯。佢個仔蕭俊謀（Vincent）返公司幫手之後，雖然都撞過板，交咗唔少學費，但係讀精算嘅Vincent巧用數據同分析，年初喺賣抽濕機一役贏咗場漂亮嘅仗，令蕭成財終於放晒心交棒。
話說近年香港天氣反覆，舊年抽濕機嚴重滯銷，但Vincent年初就大膽提出訂過千部抽濕機，蕭成財都被佢嚇咗一跳。Vincent唔係亂嚟嘅，佢認為年頭天氣好凍，預示春天氣溫回暖後濕氣會好重，加上吸取舊年嘅教訓，今年大多數電器零售商嘅訂貨態度相信會好保守，於是決定放手一博。結果真係被佢估中咗，今年抽濕機生意好到不得了，唔少行家都呻錯失良機添！Vincent咁叻，同佢讀精算學到嘅機率論及統計學有關，都話「知識就是力量」喇！