政情：何志平入公職人員誠信關注組
久未露面嘅民政事務局前局長何志平，近日突然加入公職人員誠信關注組出任名譽主席，唔知係咪有乜嘢議題特別關注呢？關注組主席謝炯全透露，何志平太太胡慧中喺半年前已經加入，其後何志平亦對關注組有興趣，最近就正式成為名譽主席。何志平就話加入關注組係因為依家香港有好多唔同聲音、暗湧、明湧，作為香港一分子，要出嚟為香港盡啲力喎。
議員收捐款惹議 「出嚟行要還」
被問到加入關注組，係咪因為廉署近日風波影響公信力呢，何志平話唔止廉署，所有民間組織、政府架構都需要有誠信，即係透明度，畀市民知道大家做緊乜，令市民心安，而所有公職人員都係為市民服務，受市民特別係媒體嘅監察，「冇誠信又點樣服務落去呢？」作為香港一分子，應出嚟呼籲港人多關注同多為事件發聲。
被問到特首梁振英亦被質疑誠信問題，佢似乎意有所指咁話，覺得領導人嘅誠信非常重要，至於梁振英誠信好唔好，就由市民判斷。咁點睇有立法會議員收取嘅捐款受到質疑，佢話市民嘅眼睛係雪亮，選民嘅選票亦係雪亮，「出得嚟行係要還o架！」