中環出更：陳美齡教仔秘笈 閱讀滿足好奇心
唔想仔女變港孩？父母可能要從小朋友細細個開始就花多啲時間去培養，卓妮尋日喺一個分享會上見到早年移居日本發展嘅歌星陳美齡，三個仔都讀美國史丹福大學嘅佢到底有乜嘢教仔秘笈？佢就話係不停製造時間出嚟陪佢哋，仲話自己好似超人咁做乜都要快。而培養佢哋好奇心及閱讀興趣亦相當重要，等佢哋主動追求知識。
依家香港唔少父母日日都忙住返工，迫不得已請外傭照顧小朋友，最近出咗本書講教導小朋友方法嘅陳美齡就話，除非想個小朋友似外傭，或者一結婚就即刻開始培訓個菲傭，否則一定要自己湊。
煮飯慳時間 陪伴傾偈
不過要花大量時間喺子女身上講就容易，時間從何來？佢坦言一日廿四小時一定唔夠用，惟有自己製造一啲出嚟，好似剪頭髮咁，佢會叫個髮型師唔好幫佢洗頭，淨係唔洗頭同吹頭都慳番四十五分鐘，剪個頭髮十五分鐘搞掂。而佢每日煮飯，個飯煲跳掣之前，佢就會煮好四餸一湯，慳咗嘅時間用嚟陪小朋友，就算真係抽唔到時間出嚟，夜晚都要陪個小朋友瞓覺，傾幾分鐘偈喎。
同場仲有資深臨床心理學家盧陳清泉，講起香港學生成績同其他地方比其實唔錯，但學生往往自我印象較低，感覺做得唔好，近年更多咗學生輕生或自殘個案，皆因壓力太大。陳美齡就話，如果小朋友童年時多同佢哋創造美好回憶，例如一齊猜謎、踢波、鬥成語甚至慶祝節日，可以喺一個小朋友面對難關時拉佢番轉頭嘅動力。
身為家長，陳美齡仲話「等陣先」係禁語，阿仔有提問就算佢煮緊飯都會熄火答佢「問得好，多謝你問媽咪呢個問題」，如果佢都冇答案就一齊去圖書館搵，笑言能令子女鍾意閱讀，個家長就歎喇！
卓妮