面係人哋畀，架係自己丟。警隊近年形象不斷插水，「黑警」之名叫到開巷，除咗反對派抹黑，更因為本身烏龍百出，撞板多過食飯，呢嗱，話口未完又嚟喇。
話說旺角暴亂後冇耐，警方喺葵涌破獲一個「武器庫」，拉咗四個人，懷疑佢哋向暴徒供應物資，點知搞完一大輪發現拉錯人，所謂「武器庫」只不過係製作環保酵素同番梘嘅倉庫。老規矩嘞，警方成功「破案」就話打鑼打鼓慌死冇人知啫，家陣衰咗咯喎，咪靜雞雞通知涉案人士撤銷案件囉。
最好笑嘅係，當初警方高調拉人，已經有環保團體代為呼冤，警方硬係好似借咗聾耳陳隻耳咁，直到依家至撤銷案件，慌唔係拖得就拖博人哋唔記得咩。難為警方尋日仲死撐，話係基於合理懷疑拉人，冇任何一方出錯，又話如果被捕人士有不滿嘅，可以透過現行機制投訴喎。
講真，警方「殺錯良民」已經唔係第一次。舊年沙田有老翁放狗被打死，警方事後控告一名智障人士誤殺，點知原來係砌生豬肉，最終多名警員被裁定疏忽職守及濫用職權，唔知係咪一件污，兩件穢，三件冇所謂，警方至會死豬不怕開水燙，講到明任port唔嬲。問題係，警方拍拍腦袋濫告亂告梗係輕鬆喇，可憐無辜市民好人當賊辦，身心嚴重受創，條數問邊個追？正如其中一名被捕人士話齋，警方拉錯人求其通知一聲就算，連句道歉都冇，兒戲成咁，以後仲點相信司法制度？
冇計喇，警方甩轆當食生菜，番梘當炸彈只係冰山一角咋。同樣喺佔領期間，有油漆工人行經旺角無喇喇畀警察扑濕之餘，仲被控告襲警，拖咗年幾至討回公道，獲政府賠償近十九萬元，亦係佔領行動後首宗成功索償個案；加埋之前有佔領人士因警方口供矛盾被判無罪及獲賠訟費，類似畸士一匹布咁長，數到天光都數唔晒。
睇到呢度，大家有冇發現事有蹺蹊？同樣係警隊，點解以前就「專業高效」，家陣完全走晒樣，到底係「假無能」定係「真放任」？事實擺在眼前，好多時就係因為警方hea查，律政司認為唔夠料砌，雙方互相扯皮之下，最終上演「警方捉人，司法放人」嘅荒謬一幕；再睇埋本地黑幫操控人蛇集團來港犯案，幕後黑手至今逍遙法外，背後係咪有人包庇，畫公仔唔使畫出腸喇啩。
始終都係嗰句，堡壘最容易從內部攻破。今日香港三權皆廢，加上警方放軟手腳，姑息養奸，群魔亂舞，牛鬼蛇神橫行無忌，又有咩出奇吖！