政情：八網難逃：網上批命富貴格 許華傑有保留
俗語話「好醜命生成」，但好多人都想知道自己命運會係點，仲會特登搵堪輿學家去批命，依家潮流仲興起玩網上批命添！中華出入口商會副秘書長許華傑（Michael）都玩網上批命，仲批出係「有錢命」同有人侍候，命格中帶有嘅嘢大多都係好嘅，似乎有啲報喜不報憂咁喎。
Michael喺個人Facebook 上載咗網上批命為佢起嘅命盤，批出係有錢命同有人侍候之外，佢命格中帶有嘅大部分都好嘢，包括「美女圍繞」、「老婆超漂亮」、「會很長壽」、「越老越帥」、「會常跑國外」，仲話命格中佢帶有賺錢嘅能力，唯一係要注意賺得多亦花得多，提醒佢慳啲使就可以儲低唔少錢喇！
個命盤一出，隨即引起哄動，Michael嘅好友紛紛留言，讚批得好準、超準、太精準，其中一個留言係話：「美女圍繞，好準……」反而Michael就話：「為了朋友們感覺良好，我只能說嘩！超準啊！」睇嚟佢對呢個網上批命嘅結果有保留喎。