政情：多才莊偉茵 配音教慳電
中電企業發展總裁莊偉茵（Quince）向來能歌善舞，做歌手及空姐都難唔到佢，最近佢又有新搞作，就係幫動畫主角做配音員。話說中電上星期推出以幼稚園學生為對象嘅教材套，特別設計咗一個好可愛嘅「超人中中」作為故事主角，以宣傳慳電訊息。不過「超人中中」要做好呢份工，仲有賴專業配音員去演活個角色，而勇字當頭嘅Quince就靈機一觸，毛遂自薦擔任配音員。
平時大家睇韓劇及卡通片，未必會太用心留意配音有幾難，但Quince就話原來配音工作一啲都唔容易，除咗要徹底投入角色外，喺時間拿捏方面都要好精準，先至唔會有「dead air」。雖然Quince錄音之前有啲緊張，但好快就已經「入晒戲」，並掌握到竅門，原本預計需要兩至三小時嘅錄音時間，最終一小時內就超額完成，唔需要靠任何電腦調聲，已經有好滿意嘅效果。Quince連配音都撈埋，睇嚟唔止教慳電，連公司開支都慳埋喎。
