政情：何啟明追完CY數 搵高永文算帳

乳腺塞 難搵專業人士幫手

話說何啟明嘅太太啱啱生完小朋友幾個月，囝囝出世後先感受到香港嘅育嬰室數目不足，加上佢媽媽非常緊張為家嫂進補，導致太太進補過多而出現新手媽媽容易遇上嘅乳腺阻塞問題。何啟明因此發現香港喺呢方面缺乏支援，好難搵到專業人士幫手，有咁切身嘅經歷，難怪佢會忍唔住發聲喇！

佢透露，母嬰健康院只提議佢太太用熱毛巾敷，但試過之後覺得完全無作用，就改為聘請相關人士上門為太太推拿。雖然情況有所改善，但進度緩慢，佢最後陪同坐完月嘅太太北上，到深圳專門醫治有關問題嘅醫院求診。經相關專業人士推拿後，太太情況大有改善，但亦需要多次覆診。忙於準備議會工作嘅何啟明只能喺太太剛接受療程嘅階段陪住太太到內地，而近期就無法抽身陪同，幸好太太已經熟路先可以放心。

質疑未了解分娩媽媽需要

經過呢次經歷後，何啟明認為香港嘅醫療仍有不足，為唔少香港媽媽帶來困擾，連佢嘅太太都大嘆香港喺呢方面比深圳仲要落後。他續指，即使啟德兒科醫院將於幾年內投入服務，但仍然欠缺呢方面嘅服務，難怪佢有意進入議會後喺呢方面多花工夫。佢懷疑高永文有長時間無接觸產後婦女，所以唔明白佢哋需要，所以將來一定會就此問題同高永文商討，研究點樣為產後媽媽提供相關專業人士嘅幫助。何啟明除咗勞工議題，仲要關心產後媽媽，睇嚟佢喺未來四年一定非常忙碌！