古時候嘅皇帝為免遭人落毒暗算，每次食飯例必搵專人用銀針試毒，仲要加多個太監試食，咁就萬無一失。嗱，家陣香港食品安全問題層出不窮，搞到市民都唔知食乜好，官僚次次把關失職，係時候向太監學吓嘢喇。
好似最近嘅哮喘豬肉事件咁吖，搞到全城人心惶惶，肉販怨氣沖天，咪就係食衞官僚把關不力嘅蘇州屎囉。食衞局局長高永文都知衰嘞，尋日要求活豬零售商及買手提交買賣紀錄，當局會就賠償問題開始內部審視，雖然仲未決定係咪賠償及點樣賠償，但由於把關責任在於港府，所以傾向以市價方式作出賠償咁話。
即係咁，作為民望數一數二嘅問責高官，高永文肯認衰都好過一味死撐嘅，之但係講到賠償咯喎，咪睇佢講得咁口響就以為有誠意問責，其實無非搵納稅人笨咋。你話唔係咩，賠償又唔係由官員自掏腰包，更加唔係扣人工補貼，正所謂不花白不花，花咗也白花，反正都係公帑，用市價賠償又有乜所謂。所以話啫，港產官僚冇嘢叻，最叻就係推卸責任，再唔係就花錢了事，最終又係納稅人埋單，呢啲咪叫黑狗偷食，白狗當災囉。
講到尾，賠償固然重要，但當務之急係搵出出錯源頭，防止事件重演。高永文話喎，內地質檢部門非常關注事件，已大致鎖定江西某啲養殖場，但具體涉及邊啲豬場，仲要等內地報告。咁即係點？即係避重就輕囉，即係卸責囉。冇錯，毒豬源頭係就係來自內地，但哮喘豬肉之所以流出市面，分明係當局把關環節出錯，到底係邊個部門疏忽，唔通唔使查清楚咩？
最騎呢嘅係，哮喘豬肉問題仲未解決，當局又蠢蠢欲動想解禁日本福島食品，簡直令人莫名其妙。大家都知，福島幾年前經歷核災難，而放射性物質可殘留環境之中長達數十年，當地出產嘅食物係咪百分百安全可靠，冇人話得埋。哮喘藥殘留可怕，核輻射更可怕，連日本人都未必敢擺落口嘅食物，偏偏當局急不及待要同當地官員商討解禁，搵香港人做白老鼠，港府有冇再無良啲吖？
真係諗極唔明，港產官僚唔止把關甩漏，次次搞到香港雞毛鴨血，家陣仲唯恐天下不亂，哮喘豬肉流入市面好似嫌未夠衰咁，係都要引入有輻射危險嘅食品先至安樂，唔通佢哋係打唔死嘅小強？定係個腦都受過輻射污染，構造異於常人？
點都好，民以食為天，食以安為先，如果港產官僚一意孤行，係都要引入福島食品，咁佢哋最好化身現代太監，以身試毒，未證明冇事之前，千祈唔好流出市面呀！