以前的教書朋友豪哥，在其臉書上「不平則鳴」。容許老朽扼要的說明發生了甚麼事，事緣他日前傍晚經過香港仔舊大街，見到有人罔顧公德，當街洗車，洗到滿地係泡，咁啱撞到有警員在查身份證，於是向其中一名警員投訴，誰知被官腔打發：「我哋依家做緊嘢！」
老實的豪哥有好市民基因，他鍥而不捨，眼見遠些少又有三名警員在街口閒談，以為天助我也，於是佢又去投訴，誰知警員又一句噴埋去：「當街洗車有乜問題？」豪哥就話：佢洗完車啲污水同化學物質流晒去雨水渠喎！想必個警員以為豪哥係「無厘頭，屙奶油」之流，反問：你又知有化學物質？
豪哥以一貫循循善誘學生嘅口脗解釋：洗到成架車都係泡喎，點會冇落清潔劑？況且洗車少不免有啲偈油之類嘅物質洗出嚟，政府唔係賣晒廣告宣傳雨水同污水「不同流不合污」嗎？警員才如夢初醒，知道遇到個有料嘅「麻煩友」，呆一呆話：哦！唔該晒，我哋會處理。呢句嘢，就等於啲廢柴官僚嘅廢噏：適當時候會公布，現階段不便透露。
豪哥於是去買嘢，回來時但見一切依舊冇變，難得嘅歲月靜好：警員依舊行行企企，完全沒有執法嘅意圖。豪哥在拍照「留念」時，聽到原來車主就是旁邊橫巷海味店老闆娘的兒子，於是有感而發：明白香港地少車多，找洗車位置不易，之不過若然用清水洗，都可以隻眼開隻眼閉，但洗到滿地泡就不能忍。佢認為政府花咁多錢進行淨化海港計劃，如果人人罔顧公德，納稅人的錢也是白花。
豪哥又曲筆話警務處招聘警員，吹噓投考者平均有大專畢業程度，為何用低智問題敷衍佢？難怪警隊在紀律部隊滿意度民調中包尾。香港雖然沉淪，但未至於病變成一潭死水，全賴有豪哥呢種正義市民。