政情：公民講場：公屋愈輪愈耐 張炳良等做炮灰

本港房屋供應緊張，公屋嘅需求殷切，然而房屋委員會尋日公布嘅最新數字顯示，截至六月底公屋輪候冊嘅申請宗數超過廿八萬，平均輪候時間要四點一年，遠遠拋離三年上樓嘅承諾，更係創十五年新高，簡直係兜巴摑向政府。政府口口聲聲話房屋問題係施政嘅重中之重，但係講就天下無敵，做就無能為力，運輸及房屋局局長張炳良之前仲多番賴覓地難，又話政府冇「點地成屋」嘅魔術棒，總之藉口一籮籮，但事實擺在眼前，依家公屋輪候時間愈來愈長，基層嘅住屋問題未得以紓緩不特止，反而係急劇惡化，張炳良等住畀市民鬧爆都得喇！