政情：跟進重建不力 傘兵楊雪盈遭離棄
灣仔大坑區議員「傘兵」楊雪盈被指喺區內嘅重建事件上懷疑怠職！據了解，當局早喺六月底已將重建資料電郵諮詢受影響區議員，今次重建主要影響大坑、渣甸山及天后，渣甸山區議員林偉文及天后區議員李文龍，即刻聯絡受影響嘅十一個屋苑法團。
一眾法團開會 不獲邀出席
其中最受影響嘅一個法團喺七月頭開會邀請三人出席，據知楊雪盈冇出席，只派出助理做代表，會上有居民不滿佢冇出席，又唔知有此諮詢，質疑「係咪掛住搞七一（遊行）」，其助理就聲稱冇收到相關文件，但被反駁點解其他議員又收到？
楊雪盈事後先知事態嚴重，急急聯絡該法團開會，又在八月頭召開居民大會，惟只有幾個法團有成員出席，但有法團成員會後認為佢唔識處理，於是再向林偉文及李文龍求助，兩人近日聯絡附近共十七個法團召開非正式會議，但與會法團成員冇諗過要邀請楊雪盈出席。
楊雪盈話喺六月底已諮詢建築師等專業人士，備妥資料後去信居民及法團解釋是次規劃申請，至於七月初嘅會議係喺開會前一日才收到通知，當日已安排公務，事後亦有邀請該大廈代表會面。至於佢喺八月嘅居民大會，有十四個屋苑六十名居民出席，具一定代表性，亦歡迎法團加入。