政情：陳凱欣暑假舉家加國散心
食物及衞生局早前功敗垂成，醫委會改革法案被醫學界議員梁家騮拉布拉到難產，連帶骨灰龕法案一同陪葬，唔少局中人都好上心，對呢兩條法案未獲通過耿耿於懷。雖然如此，局方惟有向前看，食衞局局長政治助理陳凱欣（Rebecca）收拾心情，趁暑假一家四口去加拿大溫哥華兩星期，一方面讀暑期班及畀小朋友接觸大自然，另一方面把握時間休息吓，算係忙裏偷閒。
安排仔女學英文
Rebecca話，上任四年都好少有機會去咁長嘅旅行，因為佢有親戚住喺溫哥華，所以只需買機票就可以去。佢幫七歲兒子及四歲女兒安排咗去英屬哥倫比亞大學讀英文，自己就做跟得母親，車佢哋返學，又煮飯盒畀佢哋。佢又帶兩兄妹去卡皮拉諾吊橋公園、溫哥華水族館等地方，主要想佢哋欣賞大自然及水上動物，期間又帶佢哋去史丹利公園等草地，野餐兼玩瀡滑梯。Rebecca坦言，時間好快過，要把握時間陪小朋友成長，唔知下次又會去邊呢？