政情：兩候任議員 搶閘向CY追數
政府早前刊登憲報確認有十二名來自十個功能界別嘅參選人自動當選，包括被視為「超級梁粉」嘅候任區議會（第一）功能界別議員劉國勳，及連任勞工界功能界別嘅勞聯潘兆平，兩人未正式上任已按捺不住要向特首梁振英（CY）「追數」，其中劉國勳批評CY「好多嘢都做唔到」，而向來低調嘅潘兆平更於言談間批評CY開咗唔少空頭支票「走數」。由此觀之，似乎多方嘅耐性已到達臨界點，一次訴求大爆發在所難免。
劉國勳於政界為人熟悉，緣於數年前支持CY競選特首，被外界稱為「超級梁粉」，而事隔數年後，劉國勳成功「上位」，喺無對手嘅情況下，喺立法會區議會（第一）功能界別自動當選。正當外界以為佢進入立法會或會加入「保梁」行列時，佢嘅答案卻出人意表。對於CY任內施政被外界狠批，劉國勳稱未至於對CY感到失望，但承認對方「好多嘢做唔到」，一切可能同社會太多矛盾有關。
做事欠圓滑 多番受針對
劉國勳以土地房屋問題為例，運輸及房屋局目前需要負責眾多範圍，單係交通政策涉及廣深港高速鐵路、港鐵相關事宜等已經做死，就此，佢建議房屋、土地發展嘅範疇應撥歸同一政策局負責，泛民主派無理由就此作出反對。至於CY被指任內多次挑起社會矛盾，劉國勳對CY及泛民猶如「各打五十大板」，批評CY做事不夠圓滑，而且「企硬唔等於強硬」，直言CY喺公關方面可以做得更好，而後者好多時都對人不對事，加上CY負責嘅事較多，因此部分人會針對CY。
政策困局 一味設委員會
另一邊廂，成功連任勞工界的潘兆平亦對CY喺多項勞工政策冇影有微言，佢透露，目前討論勞工政策嘅困局，就係現屆政府太弱勢，商界又企硬，其中喺標準工時、強積金對沖機制、退休保障等議題，政府一味成立委員會跟進，形容有關做法與預期有落差，建議現屆政府喺以上議題取態唔應該原地踏步，起碼要有清晰方向，以及為下屆政府訂立路線圖。
潘兆平強調，自己喺勞資問題不介意作出讓步，亦可以逐步爭取，其中以爭取劃一法定及公眾假期數目為例，據佢接觸所見，其實商界並非一味反對，只係難以接受一次過增加多日假期，佢重申，爭取改變可以是先讓步，再逐步改善去實現目標。不過，CY係咪聽得入耳實在好難講，但仲唔醒覺對症下藥，肯定自招惡果。