中環出更：何民傑搞約章 促監察政府開支
政府浪費公帑就眾所周知，但現屆立法會議員唔止監察不足，仲經常製造流會，實行嘥公帑一齊嘥。立法會議員其中一個職能係監察公帑運用，為免新一屆議員會忘本，民間團體107動力就搞咗個《納稅人約章》，召集人何民傑就話，嚟緊會呼籲候選人簽署，並承諾當選後監察政府。
何民傑話，呢份《納稅人約章》有十一項建議，包括「推動政府以互聯網提升公帑運用透明度」、「維持簡單低稅制」、「增加唔同免稅及扣稅額」等，目的係希望議員監察公帑係咪用得其所，保障納稅人權益，甚至係減輕納稅人嘅壓力。佢仲話，嚟緊會以電郵、電話、甚至落去街站接觸每位候選人，希望至少有五十位候選人簽署。
希望新一班議員幫手推動
其實107動力喺○八年都有做過同類型約章，當時就只有約十人簽署。何民傑就話，對比起上次份約章，今次就多咗具體嘅政策倡議，希望新一班議員可以推動建議。佢仲解釋，今年再搞番嘅原因，除咗係希望議員唔好忘本之外，仲希望可以引起公眾關注，保障納稅人嘅血汗錢。
卓妮