中環出更：手機保安漏洞 商界防不勝防
近日傳出Android手機及平板電腦出現保安漏洞，用家私隱隨時被盜，而其內置鏡頭及收音裝置更可能成為監視或監聽嘅工具。卓妮早幾日喺活動上見到生物化學專家曹宏威，佢本身都用緊Android手機，但就完全唔擔心，除咗覺得Android系統較開放外，仲話所謂保安漏洞有機會係商業戰中嘅技巧，即使有漏洞，其他系統亦有可能發生，如果佢被人盜取資料，即係話好多用家都有機會被盜資料，好多人陪佢喎！
中華總商會永遠名譽會長蔡冠深及貿易發展局總裁方舜文就兩個作業系統都有用。蔡冠深話，一個喺香港用，另一個就喺內地用，但同樣唔擔心保安漏洞問題，皆因佢唔會用手機進行網上交易，重要工作會留待返公司以固網電話進行，手機只用來通話及傳訊息。至於方舜文就以Android電話處理私務多，因此公司資訊暫無被盜風險，而佢平日用電話亦好安全，聽晒IT朋友及同事建議，唔會亂咁下載應用程式。
方文雄稱方便有代價
協成行董事總經理方文雄就認為，「方便」與「私隱」沒法兩全其美，當遺失手機時，買新手機一個按鍵就可以回復所有資料，已經證明資料儲存晒喺人哋度，現時上網睇文章亦經常要同意資料被使用，所以無得避。同場仲有前海管理局香港事務首席聯絡官洪為民，佢提醒市民，安裝手機App前如果見到該程式要求授權控制或取用資料有古怪，有懷疑就唔好裝，舉例影相嘅App正常要求授權鏡頭使用或定位等，但如果要授權想要你的電話簿聯絡資訊就好奇怪，可能要小心啲喇。
卓妮