政情：公民講場：肇事揸流攤搵市民埋單

江西哮喘豬流入市面風波，唔單止令市民人心惶惶，無辜「上榜」嘅肉檔更係氣憤難平，被「銷豬」時怒斥政府「點錯相」，嚴重損害商譽，大呻「躺着也中槍」。食物及衞生局局長高永文日前出來撲火時話會考慮賠償，而副局長陳肇始尋日大派定心丸，指局方亦已加強監控工作，亦明確指出喺檢討簡化檢核豬隻程序時，會考慮賠償。話時話，食環署及漁護署被質疑把關「揸流攤」導致輸入哮喘豬嘅罪魁禍首，明明係政府部門出錯，局方不但冇提及如何處分失職嘅部門，反而要納稅人找數補鑊，難怪呢個政府畀人批評無靈魂喇！