政情：陳曼琪借「獨」硬銷「檔口」
有「反佔中律師」之稱嘅中小型律師行協會（協會）會長陳曼琪（Maggie），自從退出政黨之後就搞作多多，既專注協會工作，又搞唱歌救港。佢尋日又召開記者會，評論港獨人士嘅被選舉權，點知搞搞吓，又變咗宣傳協會未來大計，明明兩件唔關事嘅嘢都可以拉埋嚟講，認真搞笑。
講錯人名「吳之鋒」
Maggie一開始就宣讀咗自己對於港獨候選人被取消資格嘅意見，認為選舉權同被選舉權都唔係絕對，而係受維護國家主權、領土完整及國家安全所需要限制。佢又認為，選舉主任有法律賦予嘅權力，決定或更改候選人係咪獲有效提名資格，所以否決港獨候選人亦係有法可依。不過，Maggie引述香港眾志黃之鋒一宗案例時，唔知點解多次將黃之鋒講成「吳之鋒」。
Maggie最後話，趁機會講吓對法律界候選人意見，順便宣傳旗下協會，佢話，協會早前同湖南和湖北有關部門簽訂嘅框架，令事務律師和大律師可以處理內地仲裁事宜，幫助本地律師發展內地市場。Maggie仲叫大家喺呢方面有乜問題可以WhatsApp問佢，但即場又唔肯提供手機號碼畀大家，唔知做乜呢？