政情：為影靚相李秀恒無懼肩周炎
里約奧運開幕數日，一眾運動員英姿都記錄在鏡頭下，一向鍾情攝影嘅香港中華廠商聯合會會長李秀恒對拍攝大型活動及動態圖片都極感興趣，佢話雖然今屆奧運冇機會現場觀賞及拍攝，但嚟緊十月於香港舉行嘅電動方程式賽車Formula E，佢就會影番夠本喇，仲自薦幫大會拍攝添！
走訪不同民族拍攝相集
不過，李秀恒影得一手靚相其實係有犧牲嘅，由於多年來背住咁重嘅攝影器材周圍走，搞到佢早前患上肩周炎，膊頭非常痛，要睇醫生，但似乎仍無損佢對攝影嘅熱愛，事關佢九月一日又將會同幾位朋友出發到西藏拍攝雪頓節曬大佛嘅壯觀場面。不過，佢返港後又要準備影Formula E，莫非當自己係鐵人？
李秀恒早前訂下計劃到內地十個不同地方拍攝多個不同民族的特色節日習俗，並集結成相集，好似雲南的潑水節等，今次西藏之行就係佢行程嘅第三站，預計需約一年時間完成多站拍攝。