港府成日吹噓「紐倫港」，話要超英趕美，家陣理想終於達到，而且仲係超額完成，爬埋倫敦頭嗰隻。可惜吖，「紐港倫」講緊嘅唔係金融中心地位，而係生活成本，你話係咪吹脹吖！
呢嗱，有國際房產機構比較全球二十個城市嘅房租以及辦公室人均成本，結果發現以往貴絕全球嘅倫敦，已經被紐約同香港取而代之，前者僱員一年嘅相關開支接近九十萬港元，而香港亦唔輸蝕，達到七十八萬港元之多，都咪話唔誇張。
正如調查機構話齋，倫敦租金成本下降，好大程度同英國脫歐公投後英鎊貶值，令租金相對下調有關，之但係本港租魔肆虐唔係今時今日嘅事，加上生活成本超高，更加令唔少外資怕怕。早排有調查發現，喺全球外派僱員生活費最高嘅城市當中，香港由排名二十六，連跳十七級至第九位，生活指數跑贏東京以及新加坡等主要競爭對手，你話嘞，外派員工生活成本居高不下，營商成本百上加斤，香港搵咩同人競爭吖。
古人話︰「長安百物貴，居大不易。」香港地衣食住行柴米油鹽吃喝玩樂，樣樣都貴過人，比昔日嘅長安有過之而無不及。冇計喇，樓價租金高企，貨品同服務價格自然水漲船高，生活成本有乜法子唔節節上升吖，除非好似假難民咁有政府包食包住，得閒仲可以打吓黑工搵真銀，否則都咪話唔惡頂！講真，香港地租金貴過人，居住環境惡劣過人，空氣差過人，連爭拗都多過人，係人都怕怕喇！
當然，此處不留人，自有留人處，面對高地價、高樓價同高租金嘅「三高」政策，外國員工最多都係過門不入，最慘係港人坐困愁城，焗住捱世界。唔使講第樣，淨係睇吓遍地開花嘅劏房，工廈、貨櫃、雞棚甚至豬欄……港式貧民窟幾乎梗有一間喺左近，就知基層市民幾咁水深火熱，仲話香港係富裕社會、國際都會喎，盞笑大人個口嘅咋。
有句經典廣告係咁講嘅︰你依家冇，但將來會有。對今時今日嘅後生仔嚟講，呢句話同對牛彈琴冇咩分別。大家有眼見，大學畢業生薪酬水平二十年如一日，從事低技術工作，收高中畢業生嘅人工之餘，仲要爭政府周身債，完全睇唔到前景同上流機會，激進港獨思想點會冇市場，社會又點會唔亂象叢生吖。
講到呢度，大家應該知道點解有條件嘅都爭住用腳投票，連瓦努阿圖都成為移民勝地喇。有人形容香港就好似小說《圍城》咁，假難民前赴後繼湧入，香港人千方百計出走，真係諗起都悲哀！