香港工業總會名譽會長劉展灝於六月十二日因心臟病發突然離世，佢生前留下嘅多項公職陸續有新人接任。政府尋日宣布，委任工總現任副主席兼香港付貨人委員會主席林宣武，出任香港生產力促進局主席，填補劉展灝嘅遺缺，任期由今日起生效，為期兩年。
林宣武係美羅針織廠第二代接班人，係深受業界尊重嘅資深工業家。佢亦出任多項公職，包括香港出口信用保險局諮詢委員會主席，以及香港物流發展局、貿易發展局、人力發展委員會及海運港口局成員。如無意外，佢應該係下任工總主席熱門人選。過去多年，生產力促進局主席多數來自工業界，包括做過工總主席嘅劉展灝、陳鎮仁及立法會議員梁君彥等人。
此外，政府亦公布委任陳建強醫生接替黃嘉純，出任新一屆香港電台顧問委員會主席，任命由九月一日起生效，為期兩年。由於委員會有多名委員因任期屆滿六年而將離任，故政府同時委任六名新成員，包括程沛威、關寶珍、藍德業、李鑾輝、黃錦輝及楊羅觀翠。
