政情：做好交運會副主席 容溟舟讀碩士
建制派喺上屆區議會取得議會全面掌控權，但舊年換屆選舉後，沙田區同深水埗區嘅泛民主派議員都大翻盤，令建制派唔敢無視泛民聲音。其中喺沙田區議會，建制派就讓出多個委員會副主席位畀泛民，獨立泛民容溟舟就成功出任交通及運輸委員會（交運會）副主席。容溟舟話，為咗方便以後跟進運輸議題，佢報讀咗港大運輸政策與規劃碩士課程，九月就會開學，等個副主席可以做得名正言順。
惡補政策 免被搵笨
容溟舟話，佢上屆曾經就巴士線重組同運輸署及巴士公司交手，發現自己喺運輸政策上認識唔夠深入，會好容易被政府部門「搵笨」，所以今屆做咗交運會副主席之後，就決心惡補。唔好以為區議員讀書就有優待呀，容溟舟話要參與面試，當時心情戰戰兢兢，好在有修讀過同一課程嘅南區區議員司馬文教路先無咁緊張。近來唔少區議員都話要進修，唔通係想為更上一層樓鋪定後路？