中環出更：民政局fb甩轆 劉江華被惡搞
里約熱內盧奧運今朝開幕，香港奧運代表隊亦已抵達奧運選手村，民政事務局嘅官方facebook（fb）專頁當然為大家緊貼奧運村嘅盛況啦，但卻出現「甩轆」事件要急急補鑊。話說專頁尋日朝早公布最新奧運情況，上載咗民政事務局局長劉江華到巴西嘅多張相片，包括與香港單車代表隊成員張敬樂嘅合照、喺選手村與代表團團長霍啟剛等人用餐嘅情況等。
冇熄標籤功能 網民即出手
點知民政事務局同事喺上載相片時，懷疑冇關閉畀網民標籤嘅功能，令一向被網民戲謔為「垃圾桶」嘅劉江華相片均被標籤上「垃圾桶」、「呃飯食」等名稱惡搞，起初仲以為係劉江華玩自嘲，點知原來係局方管理fb「甩轆」。雖然局方事後嘅反應尚算迅速，好快已將問題修正及將標籤移除，但錯誤已經為局長倒米！話時話，如果局長真係玩自嘲，可能會有出奇嘅效果都未定。
卓妮