中環出更：暢遊阿拉斯加 名人食蟹捉魚
香港夏天熱辣辣，去邊度旅行最消暑呢？太子珠寶鐘錶主席鄧鉅明及太太鄧宣宏雁（Emily）、愛沙尼亞駐港名譽領事林建康及太太林黃寧艷（Lianne）、珠寶設計師劉黃寧達（Leta）一家三口等城中名人，就齊齊坐郵輪暢遊美國阿拉斯加，見識冰河世紀風光、大擦阿拉斯加蟹。當郵輪駛近哈伯冰河時，團友們不時聽到天崩地裂巨響，原來係冰塊裂開跌落海中嘅聲音，相當震撼。
Emily一家三口首次去阿拉斯加玩，見到好多新奇事物。例如去到盛產三文魚嘅地方時，聽到三文魚喺河川產卵後就會死，魚仔大啲就游出大海，長大後再逆流而上游返鄉下，然後產卵、死亡，Emily直言感受好深，覺得生命嘅力量好偉大，又好似人要落葉歸根咁。其後造訪一個小鎮時，Emily喺一間店舖買咗個有五隻熊仔嘅紫水晶雕塑，老闆兼藝術家咁啱係香港人，他鄉遇知音特別開心。
林黃寧艷難忘冰塊崩解
Lianne同Leta兩姊妹今個暑假認真悠長，Lianne七月初已同兩個仔去倫敦參加暑假班，稍後與丈夫林建康會合，然後再飛往溫哥華參加十日阿拉斯加郵輪之旅。Lianne講起行程都好雀躍，除咗被哈伯冰河嘅冰塊崩解景象震懾外，亦巧遇兩條座頭鯨喺海中暢泳，仲首次捕捉到野生三文魚，笑言全日都好興奮。
有三文魚梗係有鍾意掌摑三文魚嘅黑熊？不過佢哋只係見到標本，Leta同囡囡劉田齡喺冰川公園見到黑熊標本即爭住合照。Leta話，坐完郵輪後將同囡囡、奶奶去瑞士度假，直至九月初陪女兒喺英國開學後先返港。
卓妮