早前我哋見到中華廠商聯合會副會長吳宏斌，講起原來佢係埃塞俄比亞駐港澳名譽領事，究竟佢同埃國有乜淵源？佢就話其實係多年前埃塞俄比亞航空開辦香港航線，於是就搵咗佢擔任該國名譽領事，依家已經做咗十幾年。佢去過兩次埃塞俄比亞，話當地基建方面有所進步，而且好多文化特色，幾好玩o架，但就唔係好習慣食當地嘅主要食糧Injera軟薄餅，話食落有陣發酵嘅酸味，個樣又成條灰色毛巾咁，無論賣相定口味都未必啱香港人喎！
