政情：教局政助 湊B要請教人
政圈今年非常旺添丁，唔少議員、官員嘅小朋友都排住隊出世，好似教育局政治助理施俊輝（Jeff）都喺月前做咗新手爸爸，佢上星期就幫囡囡舉行溫馨百日宴，仲上載多張合照上網，同好友分享做爸爸嘅喜悅。
幫手照顧減太太負擔
Jeff話，囡囡Shereen上周剛滿一百日，佢同家人為Shereen舉辦咗個小型慶祝會，簡簡單單咁切蛋糕慶祝。由於佢工作比較繁忙，照顧囡囡嘅重任就落咗喺太太身上，但佢都有幫手換吓尿片，亦有同囡囡沖涼，減輕太太負擔。問到湊女辛唔辛苦，Jeff就話囡囡好乖，所以佢兩公婆都好安慰。
近年出現唔少怪獸家長，喺子女出世之前已經搵學校及安排一切，本身係十優狀元嘅Jeff話，只係希望囡囡可以健康成長，搵學校一事都仲有時間。雖然話Jeff喺教育局工作，但佢話唔少育兒上嘅問題都未係好了解，所以都要請教身邊同事，Jeff呢個新手爸爸真係有排學喇。