政情:精靈滿屋騸雞晒命

香港最近掀起捉「比卡超」熱潮,唔少人都攞住手機,周圍留意邊度有精靈捉。不過,民主黨(白鴿黨)立法會議員單仲偕(騸雞)就唔使四圍走,皆因佢全屋都係「比卡超」等小精靈,有至少三百隻,尋日仲將照片上載至facebook,想要邊隻有邊隻,唾手可得。不過,呢啲小精露全部係佢兩個囝囝儲落嚟嘅,各位讀者想捉都捉唔到。

騸雞話呢批小精靈係囝囝十幾年前以扭蛋方式儲落嚟嘅,依家趁住比卡超熱潮,所以拎出來「晒冷」囉。至於上星期開始可以玩嘅手機應用程式「Pokémon GO」,佢亦有下載,仲去過灣仔同銅鑼灣捉小精靈添,但佢承認自己仍係初階,兩個囝囝喺美國就玩得出色好多,仲教佢喺香港可以去人多嘅地方擺街站,既可宣傳,亦可齊齊捉小精靈。

之不過,有人就發現三百隻公仔當中,其中有幾隻並唔係小精靈,而係數碼暴龍公仔,似乎連佢自己都搞唔清楚喎。

第一手消息請下載on.cc東網iPhone/iPad/Android/Windows Phone Apps