上文老朽話鬍鬚曾鍾意廢噏當秘笈，確係肺腑之言；呢，佢接受電台訪問，被問到會否改變初衷參選特首，佢就話如果可以對香港有貢獻，會願意考慮。不過，佢又九唔搭八，形容特首是一份「衰工」。廢官廢話，從此又多一則。
阿哥，一份「衰工」搞到咁多人表面抗拒，內心渴望，欲拒還迎，好不煎熬啊！呢份「衰工」唔通係「色降」？眾所周知，特區高官嘅年薪高過好多大國領袖嘅薪酬，而佢哋可以將「集體負責」變「集體卸責」，最後變成「冇人負責」，叻過世界級魔術師大衞高柏飛，佢表演「穿越萬里長城」，藝高膽大；而特區高官「飛越問責」，同樣神乎其技！「香港幾好都有，點捨得走」其實係講畀佢哋聽！至於特首呢份「衰工」，好似CＹ，相信連美國總統奧巴馬都要眼紅。
點解咁講？去年CＮＮ公布全球十二個地區領導人薪酬排名，奧巴馬年薪約三百一十二萬；其次為加拿大總理約二百零三萬；德國總理約一百八十三萬。排第十二為中國國家主席，約十七點二萬。特首咁嘅「衰工」，久不久出來做場騷，雖不討厭，但全無用處！咁就年薪四百四十四萬！衰年政改談何易，唱罷蓮花又一春！特首係份「衰工」，鬍鬚曾連牌面都呃人！技劣如此，想你對香港有貢獻，睇怕是山溝的石頭——變不成雞蛋！佢做咗財爺咁多年，為香港經濟貢獻咗乜呢？每次「派糖」搞到天怒人怨，再叫佢「團結各方」，創造社會和諧，更是嘥氣！老朽勸佢都係唔好諗份「衰工」，得閒耍詠春教劍擊才是實事求是。
管子說，君之所審者三：一曰德不當其位，二曰功不當其祿，三曰能不當其官。此三本者，治亂之原也。尤其第三點指臣子能力與官職不相稱，是國家安定與動亂的根源。鬍鬚曾頂多做個「碰到棉花也怕受傷」的守財奴，應知足常樂，切勿戀上份「衰工」，老朽忠言逆耳，還盼鬍鬚曾三思。