大劉暴瘦 輪椅轉場開餐
自稱患有糖尿病嘅華置前主席劉鑾雄（大劉），自一年前於飯店外落樓梯時失重心仆倒，多月來都步履蹣跚，要撐住拐杖行路。尋日中午，一向去開灣仔富豪飯堂開餐嘅大劉，就轉場到尖沙咀半島酒店一樓的嘉麟樓午膳，見佢明顯暴瘦，臉容憔悴，睇落似乎心事重重。大劉入去時撐拐杖行，離開時就坐輪椅，要由兩名大漢協助先至能夠登上座駕。
尋日大約十二時半，大劉撐住拐杖喺女友陳凱韻（甘比）攙扶下現身。期間不發一言，見佢身形明顯較以往消瘦，衫褲都變得鬆身，個樣好虛弱。大劉一行人於餐廳內逗留約一小時後離去。離開時，大劉轉坐輪椅，由助手推着前行，甘比則代佢拎拐杖。
登車時需兩大漢協助
由於行動不便，大劉上車時頗為「論盡」，需由兩名彪形大漢從旁協助，幾經辛苦才能登上座駕。在場記者問佢身體如何，佢未有回應，唔知係糖尿病惡化，抑或罹患其他疾病呢？