中環出更：企業第二代 「恒」心贏信任
家族企業嘅世代接班非小事，尤其係繼承者們想贏得老臣子肯定，邊有咁簡單？香港管理專業協會前日舉行頒獎禮，大家樂集團前主席陳裕光及有份攞獎嘅金城營造執董王紹恆（Rex）都有出席。陳裕光話，最近忙於籌辦第一屆傳承大獎，希望表揚傳承做得好嘅家族企業。講起傳承，Rex自爆啱啱返公司幫手時被當「唔識嘢」嘅太子爺對待，後來全憑耐心、堅持及謙卑先至贏得同事信任。
Rex係美國註冊建築師，未返家族公司前曾經喺外國建築師事務所工作，雖然係專業人士，但八年前返家族公司初期，同事都當佢冇料到，對佢開會講嘅嘢完全唔跟進處理。
陳裕光冀表揚家族企業
Rex笑稱，好明白同事呢種心態，事關佢喺香港一間美國建築師事務所做嘢時，經常要打長途電話同美國老闆嘅女兒匯報，佢次次講完電話都心諗：「佢識乜鬼吖？」所以後來佢認真與同事溝通，逐個問番進展，情況先有好轉。
陳裕光就話，企業傳承得好並非財富咁簡單，而要同時處理好家族關係、家庭理念及知識傳承。香港唔少企業已傳承到第三、四代接班，所以佢想藉着舉辦傳承大獎，表揚做得有規有矩嘅家族企業。
當晚籌委會主席係馬會大董利子厚，佢做過家族企業希慎興業董事總經理，對優質管理及傳承自然有心得。利子厚話，佢嘅管理風格係要聆聽、接受同事意見，認為香港嘅優勢係國際化，只要企業注重產品及管理品質，就唔怕欠缺競爭力喇！
卓妮
