俄羅斯總統普京同俄羅斯民眾進行年度「直播連線」，話明直播，無遮無掩，相當考一個人嘅辯才及反應。有一次被問到「如果土耳其總統埃爾多安和烏克蘭總統波羅申科同時在你面前落水，你會先救誰？」普京不徐不疾的答：「如果某人決定去死，那麼想去救他已是不可能的事情。」果然是「強人妙語」。
老朽之所以想起這則軼事，皆因聽到鬍鬚曾日前接受電台訪問，都唔知佢係撞鬼抑或撞邪，平時喺網誌都廢噏當秘笈，不食人間煙火堅離地，一時自稱「中產」，一時話鍾意食蝦餃，一時話喜歡睇法國電影飲吓咖啡；呢個年薪幾百萬嘅「中產」可能日子太無聊，回想前塵往事，竟忽然懷念前主子兼沙煲兄弟曾蔭權爵士，大讚其「行政表現一流」；又激欣賞末代港督肥彭係「有歷練嘅政客，懂得抓大放小」。
鬍鬚曾嘅品味異於常人，難怪每年財政預算都估錯，錯如毛毛蟲弓腰——以屈求伸。政府明明庫房水浸，卻一句「量入為出」就堂堂正正做守財奴，年年派糖如執藥，幾十個櫃桶加加減減，「手法表現一流」，「有歷練嘅財技，懂得朝三暮四」，咁就唔經唔覺做咗近十年財爺！自「習握手」後，聽聞仲想更上層樓。之不過，聽過佢嘅「肺腑之言」，老朽為之危也。
無他嘅，一個人講嘢如放毒，恰如英國作家奧威爾在《一九八四》描寫的「雙重思想」，好像「戰爭就是和平」、「自由就是奴役」、「無知就是力量」；鬍鬚曾就把「醜聞當一流」、「千古罪人當聖人」，明顯係思維混亂，有出千之嫌。古人說：「政以得賢為本，理以去穢為務」，如今鬍鬚曾反其道而行，在語言上放毒，顛倒黑白，混淆視聽，老朽都冇可能救佢。一句話晒：若自知應自斷！混了這麼久，見好就收吧！否則毒氣攻心，危及己身就無謂喇！