政情：今日你上鏡：余偉傑帶團交流當旅行

暑假已經過咗一半，好多名人都去咗外遊，但裕華國貨董事總監余偉傑（Andrew）就話無打算暑假去旅行，只係計劃下月同百仁基金帶啲學生去北京及廈門交流，順便當去旅行。Andrew身兼百仁基金副主席，梗係要隨團支持啦！其實Andrew月初先去咗加拿大參加表哥嘅婚禮，仲首次擔任婚禮司儀，印象深刻。返港無耐，佢又陪爸爸裕華國貨董事長兼總經理余國春同姐夫返馬場為愛駒打氣，就算唔外遊，節目都一樣咁豐富。