政情：任一帶一路專員 蔡瑩璧「無糧」
退休四年幾嘅商務及經濟發展局前常任秘書長蔡瑩璧，尋日獲政府委任做「一帶一路」專員，任期不足一年，由下月一日起至明年六月底，即至今屆政府任期屆滿為止。值得留意嘅係，呢份公職冇糧出，名副其實係「無糧」專員。唔通呢個冇神經政府終於瞓醒，心知一帶一路議題好敏感，所以唔敢亂使錢，藉此博番些少同情分？
任期至下年六月底
今年施政報告中，宣布成立「一帶一路」督導委員會及「一帶一路」辦公室。據悉，政府已預留七千六百萬元應付成立辦公室嘅運作需要。曾喺政府服務三十七年嘅蔡瑩璧將擔任專員，透過上述兩個機構，聯繫政府各部門及社會各界。
不過，一帶一路政策備受爭議，無論係交流資助計劃或獎學金，都被批評嘥公帑。其中政府早前想趁立法會會期完結前為一帶一路十二億元獎學金撥款闖關，泛民同建制難得齊心阻撓，結果政府終於跪低，將計劃押後至下個會期先再捲土重來。唔知到時蔡瑩璧會唔會到立法會為政策護航呢？