政情：搶閘選特首 雙曾欲拒還迎
九月立法會選舉未開始，下年嘅特首選舉已經展開口水戰。過去一段時間喺不同場合都有發表偉論兼夾單單打打嘅財政司司長曾俊華（鬍鬚曾）及立法會主席曾鈺成，尋日不約而同暗示有興趣參選特首，但兩人仍扭扭擰擰，前者指特首個位「惡做」，後者則指「無其他合適的人表態參選」，佢先考慮參選喎。其實兩人都好想參選，如今已表明心迹，但又繼續猶抱琵琶半遮臉，遮遮掩掩，咁驚做咩呢？
曾俊華難撈又要做 前後矛盾
鬍鬚曾尋日喺電台節目中，被主持問及點解唔考慮參選特首，佢就口窒窒否認講過唔會參選，又指「如果要對香港有貢獻，我願意做（特首），我愛香港」。不過，佢隨後又指特首呢份工，係一份「衰工」、「惡做」，仲話邊個做都會畀人鬧喎。呢頭講完願意做，嗰頭又話份工難撈，認真矛盾，如果香港交由佢管理，真係不敢想像。
現屆政府被批評無靈魂、無知無覺、施政不濟，鬍鬚曾作為政府核心成員，應該有份承擔責任。加上佢擔任財政司司長多年，一直被批係「守財奴」，兼且年年估錯數，最為人詬病係建議向每名市民嘅強積金戶口注資六千元，結果被各界炮轟，最終喺政黨壓力下屈服，改為向全港永久性居民派發六千元現金，嚴重破壞政府一直奉行審慎理財嘅原則，所以佢係咪適合做特首將成疑問。
曾鈺成上屆被勸退 前路未明
至於早前以「拭目以待」回應參選特首傳聞嘅曾鈺成，亦喺電台節目中講出真心話，指社會上有能力擔任特首嘅人因為各種原因不參選，所以佢要打破悶局，等市民有得揀，仲講到明「無人出嚟，我嚟(口架)喇！」其實曾鈺成已講中重點，係咪無人參選就要求其搵個人「廖化作先鋒」呢？
如果有人參選特首又點呢？曾鈺成就講明自己嘅局限，如果有合適人選，佢一定唔會參選。如今鬍鬚曾已暗示有意參選，又係咪曾鈺成眼中嘅合適人選？佢真係有必要出嚟講清講楚。其實曾鈺成上屆想參選已經係公開嘅秘密，只係最後被勸退作罷，今次佢又預早搶閘開定聲話有意參選，到時又係咪會被勸退、讓路？大家就要「拭目以待」喇。