中環出更：漢奸黎寓所又有示威 累埋鄰居
社會對壹傳媒黎智英（漢奸黎）嘅抗議一浪接一浪，由去壹傳媒大樓抗議示威，到上月開始有抗議人士直踩其何文田寓所，至今仍未平息。漢奸黎自己搞到家嘈屋閉當然係自作孽，但佢嘅隔籬鄰舍就真係多得佢唔少喇。尋日又再有一批人士到漢奸黎寓所抗議，批評漢奸黎禍港殃民，要打倒漢奸黎咁話。
散去後再折返叫口號
尋日上午約十時，約二十名聲稱係自發嘅男女，拉隊去到漢奸黎位於何文田嘅寓所外示威。示威者喺漢奸黎寓所正門高舉三個寫上「支持香港一國兩制」標語嘅紙牌，又高呼口號示威，眾人喺大熱天時下，仍然逗留咗一小時先散去。不過，大約十五分鐘之後，佢哋又突然折返，大叫「打倒黎智英」、「黎智英賣國賊」、「黎智英禍國殃民」及「黎智英黑金亂港」等口號，逗留咗五分鐘後離開。
自上月十日起，連同尋日到漢奸黎寓所及壹傳媒大樓外嘅示威最少有廿九次，當中自稱係霸王國際集團員工及苦主嘅佔十次、正義聯盟佔三次、旅遊業界同其他人士則有十六次。
卓妮