政情：林作要做港版約翰遜
有「港姐男友」之稱嘅大律師林作喺參選區議會敗陣後更積極喺政圈發展，但佢嘅壞孩子形象深入民心，會唔會對佢喺政界發展造成障礙？林作就話，唔會因從政而改變形象，更加借偶像前倫敦市長、現任英國外相約翰遜（Boris Johnson）做例子，話約翰遜同樣好有個人風格，亦有唔少婚外情醜聞，但仍然深得市民信任，話唔定同一形象喺香港可殺出血路！
同樣不修邊幅 頭髮雜亂
林作覺得喺外在條件上，佢同約翰遜都有幾多相似嘅地方，除咗外形上同樣有一把非常雜亂嘅頭髮，衣着又不修邊幅之外，仲同樣喺牛津大學畢業。不過，令林作最佩服嘅係，約翰遜一直同傳統政治人物好唔同，唔單止成日語出驚人，本身係保守黨成員竟然支持脫歐，多次出軌但仍受到倫敦民眾愛戴。林作話，約翰遜離經叛道都可以成功，話唔定自己可以成為港版約翰遜，做一個與眾不同嘅議員。係咪真係得？大家拭目以待喇。