講起盂蘭勝會，好多人第一時間都會諗起神功戲或鬼節，但其實盂蘭節本身係一個體現孝道、慎終追遠嘅日子，為咗傳承及推廣香港潮人盂蘭勝會呢種國家級非物質文化遺產，香港潮屬社團總會嚟緊八月十二至十四日就會於維園舉行「2016盂蘭文化節」。活動總統籌胡炎松話，市民可以於期間親身體驗「搶孤」、「盆供堆疊」及擲聖杯等活動，增加對盂蘭節認識嘅同時，順便促進親子及鄰里關係。

胡炎松話，今次活動以文化節形式進行，旨在畀市民認識盂蘭文化習俗，而唔係真正嘅盂蘭勝會，所以唔會有神功戲，但就會有3D自拍主題區及各式攤位。

提到坊間不時流傳神功戲嘅第一排觀眾席唔係畀人坐，胡炎松就話，其實神功戲同舉辦其他活動一樣，第一排往往係留畀重要貴賓坐，例如捐款舉辦盂蘭勝會嘅人或一啲鄉親代表。不過，貴賓有時會遲嚟甚至未必出席，但又唔可以唔留個位畀佢哋，所以就會出現第一排有位冇人坐嘅現象，而有啲百厭嘅小朋友為咗整蠱人就話係畀鬼魂坐嘅，傳聞因此而來。

同場仲有民政事務局副局長許曉暉、潮屬社團總會主席陳幼南、常務會董許學之及會董林月萍等。陳幼南即席示範玩盆供堆疊，將各種供奉物品有技巧地堆疊喺金漆木雕饌盒上，疊得最多最高寓意將更多福報迴向父母。至於早前腰痛嘅許曉暉就話假如條腰好番，都想試吓搶孤，佢仲話之前參觀日本人學校時都見過啲學生玩類似活動，但當然同盂蘭節無關啦。

卓妮