政情：主修電腦蒲黃金 張雲正拒認宅男
公務員事務局局長張雲正以前主修電腦，仲會每個禮拜都去鴨寮街同黃金電腦商場一次，但佢否認自己係「宅男」，仲話「蒲深水埗場嘅唔係宅男嚟嘅，蒲深水埗都未必一定冇女士陪嘅」，不過自己當年只得廿一歲，真係冇女仔陪住佢行嘅。咦！之前爆出佢同個廿幾歲嘅新聞主任「撻着」，共譜忘年戀，咁依家係咪有女朋友陪佢行街呢？佢笑住話「呢啲唔好講嘞」！睇嚟真係好保密喎。
張雲正話當年係八十年代初，電腦啱啱開始有革命，讀電腦嘅人都好熱心，自己後生想多啲了解高科技，讀完書後都唔想脫節，所以就經常去鴨寮街同黃金，同啲軟件好叻嘅人傾下偈，都係睇下新科技嘅發展方向係點，但去到又未必每次都買好多嘢返屋企，因為當時唔係搵好多錢，並非樣樣嘢都買得起。
自稱讀軟件唔識砌機
成日行黃金，唔知佢砌機係咪好叻呢？佢話自己讀軟件唔識砌機o架，承認已經好多年冇玩，依家脫晒節，同一般用家冇分別，因為電腦一年唔關心就會脫節o架啦！