政情：醫改難產 廢鑊 楊永強罪魁
有關醫務委員會改革嘅《二○一六年醫生註冊（修訂）條例》「難產」，未能於今屆立法會大會通過，事後各方梗係推卸責任喇！雖然醫委會前主席麥列菲菲早前召開記者會，力撐政府改革之必要，但尋日接受電視台訪問時亦批評政府，話政府早喺二○○一年就應該改革醫委會，但係拖足十五年，錯失改革良機，到舊年年底先肯提出，最終咪因為時間不足，搞唔成囉。換言之，麥列菲菲係暗批前衞生福利及食物局局長楊永強同有「廢鑊」之稱嘅前食物及衞生局局長周一嶽，一直歎慢板，乜都冇做過喇！
麥列菲菲話改革醫委會最好嘅時機，就係○一年，當時有共識、諮詢又足夠。但當年政府冇把握機會，提交法案畀立法會，對此感到無奈。點解係○一年？其實係因為當時醫委會審議有醫生手術時傾電話買車，但聆訊結果竟然話冇專業失德，輿論對此嘩然。
批醫生保護主義 議員做騷
雖然楊永強當年一度想提出改革，但其後因二○○三年沙士一役下台，接任嘅廢鑊八年任期都冇再跟進。直至舊年飲食界議員張宇人提出改革醫委會私人法案，現任食衞局局長高永文數票後評估可獲通過，先取而代之由政府提出，但最後都係「難產」收場。
除咗鬧政府冇做嘢，麥列菲菲亦向醫生一方開火，話有一班醫生無可否認存在保護主義，議員亦因九月面臨選舉，要攞政治本錢，而大氣候係對特首梁振英不信任，所以陰謀論滿天飛。佢直言將來多啲醫生直選入醫委會，市民又會不滿醫生選出來嘅醫生，係會幫醫生，所以長遠可以考慮另設獨立投訴機制。
怪醫駁斥抹黑 無實例支持
喺草案主力「拉布」嘅立法會醫學界議員梁家騮（怪醫）雖然唔會競逐連任，但尋日一聽到麥列菲菲嘅批評就即刻反駁。怪醫話對方批評係抹黑，需要實質事例支持，反指醫委會過去廿年，都係由政府委任嘅委員主導，如果真係有保護主義，麥列菲菲同樣責無旁貸。至於高永文早兩日提出病人組織、醫生組織同議員三方平台，怪醫已接受醫學會候任會長蔡堅邀請，參與討論，所以就算唔做議員都有排忙。