政情：公民講場：房署 食署多投訴廢柴同盟

申訴專員公署尋日發表新一份年報，總結上年度公署共收到逾五千二百宗投訴，當中就已跟進並終結的投訴個案中，最多人投訴嘅十大政府機構，房屋署以四百八十五宗排榜首，而食物環境衞生署排第二位，有四百二十宗。喺早前公布嘅鉛水調查委員會報告，指包括房屋署在內嘅多個部門集體失職，明顯係房屋署署長應耀康難辭其咎，公署仲直指店舖阻街問題，涉及食環署、房署同屋宇署，批評各部門互相推卸，令到問題遲遲解決唔到，即係食環署署長劉利群都要孭鑊，呢班簡直係廢柴同盟。