中環出更：李偲嫣踩上門 火燒「漢奸黎」
壹傳媒黎智英（漢奸黎）得罪人多、稱呼人少，加上早前霸王國際集團嘅官司，令到不滿佢嘅市民、民間團體及自稱霸王小股民嘅人士，都連番去佢嘅何文田寓所同壹傳媒大樓示威抗議。漢奸黎不斷被狙擊，除咗頻頻坐艇出海避風頭，上月底更搭飛機離開香港。不過，團體照樣去漢奸黎寓所踩場，尋日正義聯盟召集人李偲嫣就率領十多人踩上漢奸黎寓所抗議，仲焚燒印有漢奸黎頭像嘅紙張添！
尋日下午三時左右，李偲嫣一行十多人去到漢奸黎寓所門外抗議。有示威者拉起寫有「台灣敗走、香港失守」、「終身猖狂、末日匿藏」、「條數未找、咪使走佬」嘅橫額及標語，又高叫「打倒蘋果日報」等口號。
高呼「打倒蘋果日報」
之後李偲嫣更焚燒印有漢奸黎頭像嘅紙張，以表示對漢奸黎搞事禍港嘅不滿。佢哋亦都展示「宣淫洩賤禍香江」標語，批評壹傳媒旗下刊物毒害香港，佢哋逗留咗約半小時就離開漢奸黎寓所。李偲嫣早前講過會有連串聲討漢奸黎嘅行動，就算漢奸黎唔喺香港，睇怕都日日眼眉跳喇！
卓妮