中環出更：金茶王大賽 「新手」有兩手
香港唔少人都鍾意飲奶茶、咖啡，甚至每日唔飲過都唔自在，為推廣香港奶茶文化，香港咖啡紅茶協會今年繼續主辦國際金茶王大賽。尋日舉行比賽啟動禮，請咗食物及衞生局副局長陳肇始同協會主席黃家和齊齊沖奶茶。黃家和好細個已開始沖奶茶，當然難唔到佢，但新手陳肇始都竟然沖得有板有眼。
不過，原來陳肇始唔鍾意飲奶，所以冇飲奶茶嘅習慣，平時返工都見到唔少同事有飲咖啡、奶茶提神嘅習慣，但佢通常飲檸檬茶，但佢話學沖奶茶後可以考慮試吓喎。對於第一次沖奶茶，陳肇始總算冇甩轆，見佢之前傷咗嘅右手拎起茶壺都好穩陣，難怪佢話證明隻手終於都好番喇。
嚴控品質 陳德鍵「茶醉」
飲奶茶人人口味唔同，心粥館管理集團營運總監陳德鍵話，後生仔通常鍾意飲滑啲，好煙酒人士就鍾意茶味濃啲，但一個品牌要確保杯杯品質一樣，所以唔同細餐廳可以因應客人沖出唔同口味。佢又話，自己有時做品質監控，一次要試三、四十杯奶茶，搞到會「茶醉」，都咪話唔辛苦。而撐場嘅「港產陀飛輪」萬希泉創辦人沈慧林就話，佢都有飲奶茶，但可能因為係杭州人，始終鍾情中國茶多啲。
飲奶茶、咖啡難免會落糖，飲得多容易肥。尋日擔任大賽評審嘅中華廠商聯合會青年委員會副主席胡子岐亦都係自細鍾意飲奶茶，但為咗健康，已經選擇走甜，加上佢經常扒龍舟、踢波，所以都保持到身形。而佢太太Iris原來比佢更鍾意飲奶茶，但會跳舞、做瑜伽Keep Fit，唔怪得咁苗條啦。
卓妮