政情：五年死線 梁天琦趕及畢業

本土民主前線發言人梁天琦係香港大學文學院五年級生，主修哲學，副修政治及公共行政，而佢尋日就喺社交網站Facebook（fb）宣布自己畢業喇！老實講，因為佢中途留班，讀五年已經係死線，之前已經係咁被人寸佢咁遲都未畢業，若果今年都畢唔到業，好可能會被踢出校。梁天琦喺fb寫低幾句英文，首先係多謝身邊嘅友好呢幾年咁幫佢，仲同大家道別添！總算畢到業，好多網友都留言恭喜佢，又寫咗啲鼓勵說話，但亦有網友睇完佢寫嘅嘢之後話：「仲以為（你）咩事要自尋短見，原來我諗多咗！」