立法會大樓可以順利運作，多得大樓一班職員勞心勞力，唔單止有廿四小時輪更嘅保安、負責招呼議員及斟茶遞水嘅管事，仲有一眾秘書處職員。今屆立法會會期將完結，議員劉慧卿就建議，七十個立法會議員夾錢請一眾職員食飯，以答謝佢哋四年來嘅辛勞服務。
宴請職員嘅建議得到唔少人和應，據知宴會將於下周二下午喺宴會廳舉行，以流水宴形式進行，方便唔同時段放飯嘅員工可以去到用餐。七十名議員都會夾錢，到時會提供唔少精緻點心，議員會同一眾職員影相留念、傾吓偈咁。
聽講呢類型活動之前未有舉辦過，所以唔少人都覺得卿姐個建議好好，話佢臨別秋波都做咗件好事。正所謂「雞髀打人牙骹軟」，班議員咁爽快話夾錢，除咗經常麻煩到啲職員外，莫非班激進泛民主派都自知喺議事堂掟嘢、衝擊等行為搞到啲職員，所以要贖罪？