中環出更：珍貴樂器盧偉國唔放迷你倉
工程界立法會議員盧偉國本周一喺立法會議員記者同樂日大顯身手，又吹色士風又唱歌，大家都讚佢又吹得又唱得。盧偉國就話，佢屋企有成三、四十支色士風，每支都價值至少數萬元，而佢仲有十幾把古琴，以及口琴、笛、洞簫、二胡、古箏、琵琶、葫蘆絲等不同樂器。盧偉國直言，佢嘅樂器不計其數，淨係屋企都擺唔晒，所以都要擺入倉，但肯定唔係擺迷你倉囉。
買埋藝術品保險
盧偉國話，細細個已經吹口琴，後來學吹色士風，但從來都冇考級，咁多年嚟儲儲埋埋都有三、四十支色士風。不過，相信佢收藏嘅樂器中最具價值嘅應該係十幾把古琴。佢話，其古琴源自宋朝、明朝、清朝，而近十年來古琴價格上升得好快，原因就係自○三年起，古琴成為咗世界級非物質文化遺產，而佢擁用嘅其中兩把古琴更加入咗相關嘅典藏圖錄添！雖然佢唔願意講其珍藏值幾多錢，但透露已經為珍藏樂器及字畫買咗藝術品保險，真係夠晒穩陣。
卓妮