政情：關注團體請人甚艱難
關注公帑運用嘅團體「107動力」一直主張減少稅項、善用公帑，而佢哋目前只有一個全職職員，唔通連日常運作都咁貫徹節儉作風？身兼召集人嘅西貢區議員何民傑（Raymond）（圓圖）就解釋話，請人甚艱難！佢透露，團體經費的確有限，收入主要依靠募捐，所以使費都要計過度過。
政治取態影響招聘
不過，Raymond又唔會慳到做死一個員工，暑假期間會有一名實習生幫手，仲有幾千元月薪，以暑期實習嚟講待遇都唔算差喇。既然出手唔孤寒，點解仲得一個全職員工呢？佢話去年試過喺一間大專院校請實習，但最後零回音，估計學生對佢哋興趣不大，而根據前員工嘅經歷，亦推斷到另一個難請人原因。
該名前員工坦言在職時返工搞到「精神分裂」，因為個人政治取向同107動力支持領展、反對辣招等立場完全相反，所以最終都頂唔順請辭。點知Raymond第二日睇新聞，竟然見到呢名前員工參加抗議領展行動，仲高舉示威標語添！睇嚟政治取向影響好大，難怪Raymond要搵到個啱心水員工都唔容易喇！