中環出更：環球經濟波動 行善心不變
零售市道下滑，加上英國脫歐消息為環球經濟帶來波動，唔少慈善團體都大呻籌款工作難上加難。慈善組織「小母牛香港」日前舉辦周年慈善拍賣晚宴，籌委會主席杜振源都擔心善長比往年手緊，搵嚟大班朋友幫忙。其中籌委會成員陳正欣，雖然佢嘅生意暫未受脫歐造成好大影響，但英國公投期間就正於當地親身直擊，感受好深。
陳正欣話，公投當日佢同太太身在英國，天氣更驟晴驟雨氣氛相當緊張，至晚上約十時街上更靜到冇晒人，佢自己亦一直睇住事態發展。而佢早前代理咗個英國牌子，都擔心脫歐令其他貨幣匯價波動。生意受影響嘅仲有豚王老闆鄧振豪，佢話近期日圓匯價波動對生意影響頗大，但認為港人始終鍾情日本菜，所以嚟緊會再開新日式食肆。
葉澍堃馬時亨客串助籌款
當晚出席晚宴的仲有南旋集團主席王庭聰及籌委會成員鄧慶治等。講到籌款工作，杜振源話會受經濟影響，所以今年特別擔心，諗住籌到去年善款數目的八成金額已好滿足，好彩一班籌委相當落力，馬會大董葉澍堃及港鐵主席馬時亨更大獻歌喉兼客串主持拍賣環節，憑口才為當晚籌到破紀錄善款。
籌委會成員羅詠詩就搵埋兩位老友百仁基金副主席陳寧寧及菁英會理事王詩雅一同參與，前者競投咗支酒及古今地輿全圖，後者就捐出六十年代陳年茶餅作拍賣。杜振源話，目前國際小母牛已經捐咗超過五百六十隻牛及豬等禽畜予貧困農戶，並教授相關飼養技術，協助佢哋自力更生脫貧。
卓妮