中環出更：早開會未瞓醒 象哥面露紅印
立法會財務委員會尋日朝八時開會，展開八小時馬拉松式會議。進出口界議員黃定光（象哥）嘅左面額頭出現離奇神秘紅印，莫非象哥因為太早起身開會，瞌眼瞓搞到唔小心撞親個頭？原來連象哥都唔察覺額頭有紅印，隨即到洗手間照鏡查看。
象哥話，朝早起床時都冇察覺額頭有紅印，但強調冇撞到額頭，亦冇感覺到疼痛，對於為何有紅印實在摸不着頭腦。當記者笑笑口問佢係咪喺會議室瞌着覺時撞到額頭，象哥就反問︰「我成日瞌o架咩？我被人恰就有份！」
涂謹申冇記性坐錯位
另外，議員涂謹申（阿涂）開財委會會議時都坐錯位，有議員就出聲提醒︰「開財委會呀，唔係工務（小組委員會）！」阿涂先返回其位於靠近財委會主席左手邊嘅座位坐下。其後阿涂承認自己一時記錯，以為尋日朝早係開人事編制小組委員會會議，所以先至坐錯座位。象哥對額頭現紅印懵然不知，阿涂又坐錯位，莫非議員都因太早開會而未瞓醒？
卓妮