院舍券杯水車薪 守財奴虐老如故

話說春秋時期鄭國公卿子產,為免民眾冬天被河水凍傷,用自己嘅馬車接載民眾過河,孟子批評佢「好行小惠」,認為修建橋樑至係真正愛民表現。查實比起港產官僚好行小惠得嚟仲要唔湯唔水,到喉唔到肺,子產算係絕世好官咯!

呢,安老事務委員會本月初接納「長者院舍住宿照顧服務券試驗計劃」,提供最多一萬二千港元院舍照顧券,協助長者自行選擇入住院舍。當局預留八億元進行有關計劃,設六個月試用期,預計最快今年第四季提供二百五十個名額。計劃驟耳聽來幾吸引,點知外界劣評如潮,顧問報告進行嘅調查發現近九成受訪者唔接受計劃;尋日立法會福利事務委員會上,更有多個團體狠批港府霸王硬上弓添。

鬼咩,相對全港三十萬貧窮長者,二百五十張院舍券連杯水車薪都講唔上,而一萬二千元資助額更加係好睇唔好食,申請人入息五千元、資產五萬元以內至攞得足全額,其餘超過上限嘅長者,最多要自付九千多元,等於自己顧自己,呢啲咪孤寒財主算死草囉。咁都唔止,參與嘅長者要從中央輪候冊上除名兼取消綜援資助,有人形容院舍券係「糖衣毒藥」,一啲都冇誇張。

即係咁,只要住得安心,老人家又負擔得起,畀多少少冇乜所謂,問題係買位私人院舍近年亂象叢生,員工虐待長者被判刑有之,疏忽照顧導致長者死亡有之。大家應該記得,就係因為舊年大埔安老院爆出長者被剝光豬沖涼醜聞,輿論嘩然下,院舍券試驗計劃被迫押後,事隔一年,買位院舍服務質素唔見明顯改善,當局竟然關人個關,硬推計劃,講得難聽啲,同推老人家去死冇咩分別嘅咋!

難怪長者對院舍券避而遠之,有人甚至話情願早啲死都唔去私營安老院,真係聞者心酸。家陣每年有幾萬人排政府資助宿位,當中唔少人輪候期間含恨而終,講到尾都係對買位院舍冇信心。

所以話,乜都係假,一日唔增加政府資助宿位,點樣小修小補都無補於事。可惜吖,港府向來視長者如包袱,唔係將長者掟去私營安老院自生自滅,就係提倡所謂居家安老,再唔係索性叫人北上安老,其實乜嘢配套支援都冇,擺明推卸責任。難為港府開口埋口「老有所養」、「老有所依」,面對咁多長者臨老唔過得世,知唔知「醜」字點寫㗎。

廣東話歇後語︰泥水佬開門口──過得自己過得人,送畀港產官僚最啱。漂亮口號免嘞,將心比己,諗下自己收尾嗰幾年得㗎喇!